राजेंद्र पाटील राऊत
फुटजवळगाव येथे कोरोना लसीकरण सुरू, अमर पवार यांच्या सततच्या प्रयत्नांना यश.
युवा मराठा न्यूज नेटवर्क सोलापूर जिल्हा प्रतिनिधी महादेव घोलप.
टेंभूर्णी दि. 14 : कोरोना पासून बचावासाठी लस प्रभावी असल्याचे महत्त्व आता नागरिकांना पटले आहे. अर्थात लसीकरणासाठी प्राधान्य दिले जात आहे. टेंभुर्णी प्राथमिक आरोग्य केंद्रा अंतर्गत येणाऱ्या फुटजवळगावाला कोरोना प्रतिबंधात्मक लसीकरण सुरू करण्याची मागणी सोलापूरचे जिल्हाधिकारी, उपविभागीय अधिकारी माढा विभाग कुर्डूवाडी, गटविकास अधिकारी कुर्डूवाडी, तालुका आरोग्य अधिकारी कुर्डूवाडी, प्राथमिक आरोग्य केंद्र टेंभुर्णी यांना निवेदनाद्वारे रयत क्रांती संघटनेचे सोलापूर जिल्हा प्रसिद्धी प्रमुख अमर पवार यांनी केली व अखेर त्यांच्या पाठपुराव्याला यश आले.
फुटजवळगाव हे 850 लोकसंख्याचे गाव असून लसीकरणासाठी गावातील वयोवृध्द ग्रामस्थांना 7 कि.मी. अंतरावर लस घेण्यासाठी जावे लागते. गावात वयोवृध्द पुरूष व महिला यांचे प्रमाण जास्त असून तसेच शुगर, बी.पी. या आजाराचे नागरिक आहेत. त्यामुळे गावातच लस उपल्बध करून बाहेर गावी जाण्याची नागरिकांची हेळसांड थांबेल व प्रशासनावरील ताण देखील कमी होईल. टेंभुर्णी आरोग्य केंद्रास 7 कि.मी. वर जाण्यासाठी ग्रामस्थांना नाहक त्रास होत असल्याने फुटजवळगाव येथेच लसीकरण सुरू करून वयोवृद्धांची हेळसांड होऊ नये ही बाब लक्षात घेऊन फुटजवळगाव येथे लसीकरण सुरू करावे अशी मागणी रयत क्रांती संघटनेचे सोलापूर जिल्हा प्रसिद्धी प्रमुख अमर पवार यांनी केली व अखेर लसीकरण सुरू झाले.
लसीकरणासाठी लसीचे डोस फुटजवळगाव येथे वितरित करण्यात आले. लसीकरणास प्रारंभ झाला व शासनाने दिलेल्या नियमावलीनुसार सकाळी सुरू झाले. ग्रामस्थांनी चांगला प्रतिसाद दिला. प्राथमिक आरोग्य केंद्रातील वैद्यकीय अधिकारी डाॅ.दिपाली शेट्टी, सिस्टर शांता बनकर, प्रयोगशाळा तंत्रज्ञ नितीन हिलाले, आरोग्य सेवक उद्धव मोरे, आशा वर्कर्स अनुराधा मोहिते, रेश्मा शेख, जनाबाई जगताप, अनुराधा कोल्हे आदींनी लसीकरणासाठी परिश्रम घेतले. तसेच वैद्यकीय अधिकारी डाॅ.अमोल माने, ग्रामसेवक विजय शेलार, पोलिस पाटील संजय खोचरे-पाटील, प्राथमिक शाळेच्या मुख्याध्यापिका संगिता शिंदे, शिक्षक प्रमोद लोंढे, गावातील सर्व ग्रामस्थ यांचे विशेष सहकार्य लाभले.