राजेंद्र पाटील राऊत
नायगाव येथे लवकरच पालकमंत्री चव्हाण यांच्या हस्ते जि.प.बांधकाम उपविभागीय कार्यालयाचे होणार उदघाटन – जि.प.सभापती संजय बेळगे
नायगाव येथे जि.प.बांधकाम उपविभागीय कार्यालयास जिल्हा परिषद सभापती संजय बेळगे यांच्या पाठपुराव्याने मान्यता मिळाल्याची विकासवार्ता आली असून लवकरच नांदेड जिल्ह्याचे पालकमंत्री ना.अशोकराव चव्हाण यांच्या शुभहस्ते तर माजी आ. वसंतराव चव्हाण यांच्या प्रमुख उपस्थितीत नव्या कार्यालयाचे उदघाटन होणार असल्याची माहिती संजय बेळगे यांनी दिली.
या नियोजित व महत्वाच्या कार्यालयासाठी नायगाव च्या ग्रामसचिवालयाची इमारत सध्या निवडण्यात आली आहे.
नायगाव येथे जि.प.बांधकाम विभागाचे कार्यालय होते पण उपविभागीय कार्यालय मात्र बिलोली येथे सध्या कार्यान्वित असल्याने प्रत्येक संबंधित कामासाठी आधी बिलोली येथे जाऊन नंतर नांदेड येथे जावे लागत आहे, अनेक वर्षांपासून सुरू असलेली ही अडचण व कामाचा खोळंबा लक्षात घेऊन जिल्हा परिषद बांधकाम सभापती संजय बेळगे यांनी आपल्या तालुक्यातच कार्यालय व्हावे या साठी पालकमंत्री ना.अशोक चव्हाण व जिल्हा मध्यवर्ती बॅंकेचे अध्यक्ष माजी आ.वसंतराव चव्हाण यांच्या मार्गदर्शनाखाली या सार्वजनिक मागणीचा पाठपुरावा केला होता, त्यांच्या प्रयत्नास आता यश मिळाले आहे.
या सुरू होऊ घातलेल्या नव्या उपविभागीय बांधकाम कार्यालयासाठी सोमवारी मा.आ.वसंतरा चव्हाण, जिल्हा परिषद बांधकाम सभापती संजयजी बेळगे, जि.प.अधीक्षक अभियंता गहिरवार साहेब, प्रभारी मुख्याधिकारी नंदकिशोर भोसीकर, उपनगराध्यक्ष विजय चव्हाण, चेअरमन प्रदीप कल्याण यांनी शहरात चार-पाच ठिकाणी पहाणी केली व सर्वानुमते येथील ग्रामसचिवालायाच्या इमारतीची निवड केली आहे या जागेत येत्या काही दिवसातच नव्या कार्यालयाचे रीतसर उदघाटन केले जाणार असल्याची माहिती जिल्हा परिषद शिक्षण सभापती संजय बेळगे यांनी दिली.