जगद्विख्यात समाजसुधारक आणि प्रगतिशील राजे श्रीमंत सयाजीराव महाराज गायकवाड यांच्या जयंती दिनी कौळाणे (नि.) येथे दुर्दैवी शोकांतिका घडल्याचे चित्र समोर आले आहे.

कौळाणे (नि.) :

जगद्विख्यात समाजसुधारक आणि प्रगतिशील राजे श्रीमंत सयाजीराव महाराज गायकवाड यांच्या जयंती दिनी कौळाणे (नि.) येथे दुर्दैवी शोकांतिका घडल्याचे चित्र समोर आले आहे. ग्रामपंचायतीच्या निष्काळजीपणामुळे गावातील ऐतिहासिक वारसा असलेल्या राजवाड्याच्या प्रवेशद्वारावर अतिक्रमण झाल्याने स्थानिकांनी संताप व्यक्त करत आमरण उपोषण आंदोलन सुरू केले आहे.

युवा मराठा महासंघाचे संस्थापक अध्यक्ष राजेंद्र पाटील राऊत यांच्या नेतृत्वाखाली हे उपोषण आंदोलन सुरू असून त्यांना लोकहित माहिती अधिकार पत्रकार व पोलीस संरक्षण संघटनेचे महाराष्ट्र प्रदेश उपाध्यक्ष भारत पवार, चांदवड तालुकाध्यक्ष सुनील गांगुर्डे, बागलाण तालुकाध्यक्ष दावल पगारे तसेच आंशूराज राऊत पाटील यांनी पाठिंबा देत उपोषणात सहभाग घेतला आहे.

मिळालेल्या माहितीनुसार, कौळाणे येथील श्रीमंत सयाजीराव महाराज गायकवाड यांच्या मुख्य राजवाड्याच्या प्रवेशद्वारावरच एका व्यक्तीने वेल्डिंगचा व्यवसाय सुरू करून अतिक्रमण केले आहे. ऐतिहासिक आणि सांस्कृतिक दृष्ट्या महत्वाच्या या स्थळावर झालेले अतिक्रमण तात्काळ व कायमस्वरूपी हटविण्याची मागणी आंदोलनकर्त्यांनी केली आहे.

आंदोलनकर्त्यांचे म्हणणे आहे की, या गंभीर विषयाकडे ग्रामपंचायतीने वारंवार निवेदन देऊनही दुर्लक्ष केले. परिणामी प्रशासनाचे लक्ष वेधण्यासाठी आणि ऐतिहासिक वारशाचे रक्षण करण्यासाठी आमरण उपोषण आंदोलनाचा मार्ग स्वीकारावा लागला.

दरम्यान, जयंतीच्या दिवशीच गावातील ऐतिहासिक वास्तूच्या प्रवेशद्वारावर अतिक्रमण कायम असल्याने ग्रामस्थांमध्येही तीव्र नाराजी व्यक्त होत आहे. प्रशासनाने तात्काळ लक्ष घालून अतिक्रमण हटवावे आणि राजवाड्याच्या परिसराचे संरक्षण करावे, अशी जोरदार मागणी आंदोलनकर्त्यांकडून करण्यात येत आहे.

प्रशासनाकडून अद्याप कोणतीही ठोस कारवाई न झाल्याने आंदोलन अधिक तीव्र होण्याची शक्यता व्यक्त केली जात आहे.