आशाताई बच्छाव
घरकुल लाभार्थ्यांची लुबाडणूक थांबवा, अन्यथा “भीक मांगो आंदोलन” – शिवसेनेचा इशारा.
मराठवाडा विभागीय संपादक मनोज बिरादार
देगलूर तालुक्यातील घरकुल योजनेंतर्गत लाभार्थ्यांकडून पैसे उकळण्याचे प्रकार थांबवावेत, अन्यथा पंचायत समिती कार्यालयासमोर ठिय्या आंदोलन आणि “भीक मांगो आंदोलन” छेडण्यात येईल, असा इशारा शिवसेना (उद्धव बाळासाहेब ठाकरे गट) तर्फे प्रशासनाला देण्यात आला आहे. यासंदर्भात तहसीलदार भरत सूर्यवंशी, गटविकास अधिकारी माळेगावकर आणि पोलिस निरीक्षक मुंढे यांना निवेदनही देण्यात आले.
शिवसेनेच्या निवेदनात म्हटले आहे की, देगलूर तालुक्यातील जवळपास ११ हजार घरकुल लाभार्थ्यांचे बिले तयार करण्यासाठी संबंधित कर्मचाऱ्यांकडून घराचे फोटो घेतल्यानंतर दहा ते पंधरा हजार रुपये लाच मागितली जात आहे. ही लूट गंभीर असून गरीब लाभार्थ्यांची खुलेआम लुबाडणूक सुरू आहे. याशिवाय, सिंचन विहीर, जनावरांचा गोठा, पाणंद रस्ते यांसारख्या मनरेगा योजनेंतर्गत होणाऱ्या कामांमध्येही संबंधित विभागातील कर्मचारी पैशाची मागणी करत असल्याचे आरोप करण्यात आले आहेत.
शिवसेनेचे उपजिल्हाप्रमुख महेश पाटील आणि तालुकाप्रमुख बालाजी इंगळे पाटील खुतमापुरकर यांच्या नेतृत्वाखालील शिष्टमंडळाने प्रशासनाकडे तातडीने कारवाईची मागणी केली आहे. त्यांनी स्पष्ट इशारा दिला की, जर संबंधित दोषी कर्मचाऱ्यांवर लवकरात लवकर कारवाई केली नाही, तर ३० जून रोजी पंचायत समिती कार्यालय देगलूर येथे तीव्र आंदोलन छेडले जाईल. त्यात “भीक मांगो आंदोलन” ही करण्यात येणार असल्याचे त्यांनी सांगितले.
या निवेदनप्रसंगी खुतमापुरचे सरपंच बालाजी चोपडे, विभागप्रमुख व माजी सरपंच राजू उल्लेवार (मुजळगे), कावळगड्डा तंटामुक्त समितीचे अध्यक्ष रमेश पाटील, शाखाप्रमुख शिवाजी जाधव पाटील, सरपंच मा. आकाश गजले, युवा नेते मा. योगेश पाटील (कावळगड्डा), शिवाजी सोनकांबळे (मुजळगा) यांच्यासह शिवसेनेचे अनेक पदाधिकारी व कार्यकर्ते उपस्थित होते.
प्रशासनाने या निवेदनाची गांभीर्याने दखल घेऊन तातडीने चौकशी करून दोषींवर कठोर कारवाई करावी, अन्यथा जनतेसोबत रस्त्यावर उतरून संघर्ष करण्यास शिवसेना सज्ज असल्याचा इशाराही यावेळी देण्यात आला.
