कर्जापाई शेतकऱ्याची आत्महत्या गळफास घेऊन शेतकऱ्यांनी संपवली जीवन यात्रा, सततची नापिकी व आर्थिक विवंचेतून घेतला जगाचा निरोप.

आशाताई बच्छाव

कर्जापाई शेतकऱ्याची आत्महत्या गळफास घेऊन शेतकऱ्यांनी संपवली जीवन यात्रा, सततची नापिकी व आर्थिक विवंचेतून घेतला जगाचा निरोप.
युवा मराठा न्यूज मोताळा तालुका प्रतिनिधी संजय पन्हाळकर
चिखली तालुक्यातील मेरा बुद्रुक येथील शंकर झुंगाजी डोंगरदिवे वय 66 वर्ष यांनी आज सकाळी दिनांक 02 जुन 2024 रोजी त्यांच्या शेताशेजारील अशोक नारायण पडघान गट नंबर 168 यांच्या धुऱ्यावरील रामफळ या झाडाच्या दक्षिणेकडील फांदीला दोरीच्या साह्याने गळफास घेऊन आत्महत्या केली आहे. त्यांच्याकडे सामायिक क्षेत्रामध्ये गट नंबर 210 व 213 मध्ये दोन एकर नऊ गुंठे जमीन आहे. सततची नापिकी, मालाचे पडलेले भाव, यांत्रिकी शेती झाल्यामुळे शेतीचा खर्च वजा बाकी काही राहत नाही. त्यामुळे त्यांचे आर्थिक परिस्थिती ढासळलेली होती. आता समोर पेरणीचे दिवस आले असताना आणखीन शेतीला खर्च कुठून लावायचा ,आर्थिक तडजोड कशी करायची या विवंचनेत त्यांनी जगाचा निरोप घेतला या घटनेची माहिती मिळताच महसूल विभागाचे कर्मचारी कोतवाल सचिन पडघान व मेरा बुद्रुक पोलीस पाटील बद्री पडघान यांनी अंढेरा पोलीस स्टेशनला माहिती दिली. माहिती मिळताच अंढेरा पोलीस स्टेशनचे कर्मचारी अमलदार गणेश देढे व वायाळ यांनी घटनास्थळी येऊन पंचा समक्ष पंचनामा करून मृतदेह शवविच्छेदनासाठी चिखली येथे सरकारी दवाखान्यात पाठवण्यात आला. आत्महत्याग्रस्त शेतकरी शंकर झुंगाजी डोंगरदिवे यांच्या पश्चात त्यांची पत्नी एक मुलगा आणि दोन मुली असा परिवार आहे. पुढील तपास अंढेरा पोलीस स्टेशनचे ठाणेदार विकास पाटील यांच्या मार्गदर्शनाखाली बीट जमदार देढे हे करीत आहे