आशाताई बच्छाव
नैताळे येथे मराठा आरक्षणासाठी सरणावर बसून आमरण उपोषणास सुरुवात
स्वराज्य पक्षाचे संस्थापक छत्रपती संभाजी राजे यांनी दिली भेट
दैनिक युवा मराठा
रामभाऊ आवारे निफाड
जालना जिल्ह्यातील अंतरवाली सराटी येथील मनोज जारंगे पाटील यांनी गेले दहा – बारा दिवसापासून मराठा आरक्षणासाठी आमरण उपोषण सुरू केलेले आहे. त्यांना समर्थन म्हणून नैताळे येथील मराठा शेतकरी वाल्मिक गंगाराम बोरगुडे यांनी आज दि.१० सकाळी ८ वाजेपासून नैताळे येथे ग्रामपंचायत कार्यालयासमोर आमरण उपोषणास सुरुवात केली आहे .
दरम्यान आज उपोषणाची माहिती मिळताच छत्रपती संभाजीराजे यांनी उपोषणस्थळी भेट दिली. कालपासून उपोषणाची तयारी सुरू असून गावातील तरुणांनी घरोघरी जाऊन लाकडे व गोवऱ्या जमा केल्या. आज सकाळी असंख्य तरुण उपोषणस्थळी जमा झाले आहेत. ‘जय जिजाऊ, जय शिवराय’, एक मराठा लाख मराठा’ अशा घोषणा देऊन छत्रपती शिवाजी महाराजांच्या पुतळ्यास हार घालून उपोषणास सुरुवात करण्यात आली. उपोषणस्थळी भजनी मंडळी टाळ मृदुंगाच्या गजरात भजन सुरू आहे. बोरगुडे यांना पाठिंबा म्हणून गावातील असंख्य युवक उपोषणास बसले आहे. निफाड पोलीस स्टेशनचे पो.निरीक्षक बी.एस.महाजन यांच्या नेतृत्वाखाली चोख बंदोबस्त ठेवण्यात आला आहे.
◆ सरकारने राजकारण बाजूला ठेवत सर्वसामान्य गरीब मराठा समाजाला मराठा आरक्षणाच्या माध्यमातून समाजाला न्याय द्यावा. तमाम आंदोलक मराठा बांधवांच्या भावना शासनापर्यंत पोहोचवून समस्त मराठा समाजाला आरक्षण मिळवून देण्यासाठी मी अहोरात्र प्रयत्न करीत आहे, आंदोलकांनी आमरण उपोषण करत असतांना तब्येतीची काळजी घ्या.
*छत्रपती संभाजीराजे–संस्थापक स्वराज्य पक्ष*
