आशाताई बच्छाव
साल्हेर किल्ल्यावरील घटनेत मृतात मालेगांवच्या तरुणाचा समावेश; एक जखमी..!
(निलेश भोये/गोपीनाथ भोये युवा मराठा न्युज नेटवर्क)
साल्हेर- आज साल्हेर येथील घटनेत मृत पावलेला युवक हा मालेगांव शहरातील असून,त्यासोबत जखमी झालेला युवक व इतर १० दहा युवक आज साल्हेर किल्ल्यावर ट्रेकींग साठी गेले होते अशी माहिती प्राप्त झाली आहे.
याबाबत पोलिस सुत्रांकडून मिळालेली माहिती अशी की,आज मालेगांव शहरातील एकूण बारा मुले सटाणा तालुक्यातल्या साल्हेर किल्ल्यावर ट्रेकींगसाठी आलेली होती,त्यापैकी कडयावरुन पाय घसरल्याने भावेश शेखर अहिरे रा.मालेगांव वय २१ हा किल्ल्यावरुन खाली कोसळल्याने मृत पावला तर भावेशच्या हाताला धरलेला दुसरा तरुण मनिष सुनील मुठेकर रा.मालेगांव वय २१ हा खोल दरीत कोसळल्याने जखमी झाला आहे.हि घटना साधारणतः दुपारी दोन वाजेच्या सुमारास घडल्याचे सांगितले जात आहे.याबाबत जायखेडा पोलिसांना माहिती मिळताच तात्काळ घटनास्थळी दाखल होत,पोलिसांनी पुढील शोधकार्य सुरु केले.घटनास्थळावर मालेगांवचे अप्पर पोलिस अधीक्षक चंद्रकांत खांडवी यांनी स्वतः भेट देत तपास पथकाला शोधकार्यात मदत केली.तर जखमी मनिष सुनील मुठेकर यास स्वतः चंद्रकांत खांडवी यांनी आपल्या खांद्यावर उचलून आणत अवघड असलेल्या साल्हेरच्या दरीतून बाहेर काढल्याने पोलिस खात्याचे विशेष कौतुक व अभिनंदन होत आहे.या घटनेचा पुढील तपास जायखेडा पोलिस स्टेशनचे सहाय्यक पोलिस निरीक्षक श्रीकृष्ण पारधी यांच्या मार्गदर्शनाखाली पो.नाईक रवि भामरे हे करीत आहेत.
