आशाताई बच्छाव
‘कसे सत्य सांगू, की मला माणसाची भीती वाटते रे..’
‘श्रावण हिरवळ..कवितेचा दरवळ…अंजनी फाऊंडेशनच्या वतीने आयोजित कवि संमेलन रंगले
जालना / दिलीप बोंडे ब्युरो चीफ: अंजनी फाऊंडेशनचे संस्थापक अध्यक्ष पोलीस उपनिरीक्षक बालाजी किरवले यांच्या मातोश्री स्व. अंजानी किरवले यांच्या 21 व्या स्मृतिदिनानिमित्त आयोजित ‘श्रावण हिरवळ..कवितेचा दरवळ…’ हे निमंत्रितांचे कवि संमेलन बहारदार कवितांनी रंगले. एकापेक्षा एक सरस आणि तितक्याच आशयघन कवितांची बरसात झाल्यामुळे रसिक मंत्रमुग्ध झाले.
जालना शहरातील ब्राह्मण सभा भवनात गुरुवार, 22 ऑगस्ट रोजी सायंकाळी ‘श्रावण हिरवळ..कवितेचा दरवळ…’ हे निमंत्रितांचे बहारदार कविसंमेलन पार पडले. या संमेलनाचे उदघाटन जिल्हा विधी सेवा प्राधिकरणच्या सचिव न्यायाधीश श्रीमती भालसाकडे वाघ यांच्या हस्ते झाले. कार्यक्रमाच्या अध्यक्षस्थानी पोलीस उपनिरीक्षक बालाजी बालाजी किरवले होते. यावेळी ज्येष्ठ विधीतज्ञ ब्रह्मानंद चव्हाण, जीवरेखा नदी समन्वय एम.डी.सरोदे, ओम हॉस्पिटलचे अर्जुन वाहुळे यांची प्रमुख पाहुणे म्हणून उपस्थिती होती.
या ठिकाणी जिल्हा विधी सेवा प्राधिकरण सचिव भालसाकडे वाघ मॅडम यांनी मनोगत व्यक्त करताना महिलांचे हक्क कायदे व अधिकार या विषयी थोडक्यात माहिती दिली..
यावेळी कवि डॉ. सुहास सदावर्ते यांच्या
‘कसे सत्य सांगू, कसे काय भांडू,
की मला माणसाची भीती वाटते रे..’
या आणि कवि कैलास भाले यांनी सादर केलेल्या
‘पाऊस अवकाळी, विझवतो चूल
गळक्या घराला,अफूची भूल…’
या लघु कवितांना रसिकांना अंतर्मुख केले. डॉ. दिगंबर दाते यांनी सादर केलेली
‘आभाळात गेलेला बाप आणता येत नसतो परत…
असताना कुठे कळतो तो, नसताना बसतो झुरत…’ या कवितेने रसिकांची दाद मिळविली.
