आशाताई बच्छाव
मालेगाव (प्रविण क्षीरसागर युवा मराठा न्यूज नेटवर्क):- रोकडोबानगर येथील एका लाकडाच्या वखारीत लाकूड कापण्याच्या पात्यात सापडून गोकुळ उखा पवार (२८) तरुणाचा दुर्दैवी मृत्यू झाला. यात त्याचे शिर व धड वेगळे झाले आहे. या घटनेमुळे सर्वत्र एकच हळहळ व्यक्त केली जात आहे.
गोकुळ हा रोकडोबानगर जवळच असलेल्या अन्नपूर्णा वखार येथे कामगार म्हणून कामाला असल्याचे कळते. तो बुधवारी (दि.१२) सकाळी ११ वाजता कामावर गेला. त्या ठिकाणी तो लाकुड कापण्याच्या पात्याच्या दिशेने चालत जात असताना कटर पात्यावर पडला. यात त्याचे शिर धडावेगळे झाल्याचे सीसीटीव्ही मध्ये दिसत आहे. या घटनेची माहिती मिळताच कॅम्प विभागाचे पोलीस उपअधीक्षक सुरेश गुंजाळ यांच्यासह छावणी पोलीसांनी धाव घेत घटनेचा पंचनामा केला. यावेळी पोलीसांनी घटनास्थळावरील सीसीटीव्ही फुटेज ताब्यात घेतले आहे. गोकुळ याचा मृतदेह मालेगावी सामान्य रुग्णालयात शवविच्छादनासाठी आणण्यात आला आहे. गोकुळ याच्या पश्‍चात पत्नी, एक मुलगा, एक मुलगी, वडील, दोन भाऊ असा परिवार आहे.
