जयबाबाजी चौकात घरफोडी

आशाताई बच्छाव

जयबाबाजी चौकात घरफोडी
चाळीसगाव प्रतिनिधी विजय पाटील – शहरातील जयबाबाजी चौकात दिवसाढवळ्या चोरट्यांनी घराचे कुलूप चावीने उघडून घरात प्रवेश करून कपाटातील लॉकरमधून सुमारे 30 हजार रूपये किंमतीची सोन्याची मंगलपोत व रोख 2 हजार रूपये असा 32 हजार रूपयांचा ऐवज लंपास केला.
समाधान पंढरीनाथ काळे यांच्या घरी दि. 27 रोजी सकाळी 10.30 ते दुपारी 12.15 वाजेच्या दरम्यान ही चोरी झाली. अज्ञात चोरट्याने काळे यांच्या राहत्या घराच्या दरवाजास टांगलेल्या चावीच्या सहाय्याने कुलूप उघडून आत प्रवेश करून कपाटातील लॉकरमध्ये ठेवलेली सोन्याची मंगलपोत व रोख रक्कम असा सुमारे 32 हजार रूपयांचा ऐवज लंपास केला. याप्रकरणी काळे यांनी दिलेल्या फिर्यादीवरून चाळीसगाव शहर पोलीस स्टेशनला अज्ञात चोरट्याच्या विरोधात गुन्हा दाखल करण्यात आला आहे.तपास पोना. महेंद्र पाटील करीत आहेत.