आशाताई बच्छाव
गटसचिवांचे थकीत वेतन देण्याची मागणी
मालेगांव,(प्रतिनिधी आशाताई बच्छाव)-जिल्ह्यातील गटसचिवांचे गेल्या चार महिन्यांपासून वेतन रखडल्याने जिल्हा सहकारी संस्था,सचिव व कर्मचारी युनियन अंतर्गत मालेगांव तालुका गटसचिव संघटनेतर्फ शुक्रवार दिनांक १६ जुन २०२३ पासून कामबंद आंदोलन सुरु केले आहे.
दरम्यान रखडलेली थकीत वेतन त्वरीत मिळावे या मागणीसाठी सहकारी संस्था उपनिबंधक सचिन घोडके यांना तालुका गटसचिव संघटनेने सोमवारी दि.१९ रोजी निवेदन दिले आहे.जिल्ह्यातील गटसचिवांचे फेब्रुवारी ते मे अशा चार महिन्यांपासून वेतन अदा करण्यात आले नाही.जिल्हास्तरीय समितीने कुठल्याही प्रकारे पत्रव्यवहार न करता बेकायदेशीरपणे वेतन रोखले आहे.त्यामुळे जिल्ह्यातील सगळ्या गटसचिवांना उदरनिर्वाहास,मुलांच्या शैक्षणिक कामात मोठा अडथळा निर्माण झाला आहे.गृहकर्ज,हप्ते,विमा हप्ते,वैद्यकीय खर्चासारख्या समस्यांना तोंड द्यावे लागत आहे.त्यामुळे तातडीने वेतनबाबत निर्णय घेण्यात यावा अशी मागणी यावेळी करण्यात आली.निवेदनावर राज्यध्यक्ष विश्वनाथ निकम तालुका संघटना प्रतिनिधी उमेश बोरसे यांच्या सहया आहेत.