आशाताई बच्छाव
आविष्कार संस्थेमध्ये गणेशोत्सव साजरा
रत्नागिरी,(सुनील धावडे)- दरवर्षी प्रमाणे आविष्कार संस्थेमध्ये सौ. सविता कामत विद्यामंदिर व शामराव भिडे कार्यशाळा यांचा एकत्रित गणेशोत्सव साजरा करण्यात आला. यासाठी कार्यशाळेतील दीप्तेश पाटील यांच्या मार्गदर्शनाखाली मुलांकडून लगद्यापासून पर्यावरण पूरक गणेश मूर्ती बनवण्यात आली. वर्गावर्गातील तयार केलेल्या गणपतीच्या कलाकृतींचे तसेच विद्यार्थ्यांनी रंगवलेल्या गणपतीच्या चित्रांचे प्रदर्शन मांडण्यात आले होते.
इंद्रधनुष्याच्या रंगांच्या पताका लावून सजावट करण्यात आली होती. गणेश मूर्तीची शाळेच्या प्रवेशद्वारापासून ढोल ताशाच्या गजरात गणपती बाप्पा मोरयाच्या घोषणा देत मिरवणूक काढण्यात आली. गणेशमूर्तीची प्राणप्रतिष्ठापना झाल्यानंतर आरती करण्यात आली. ज्ञानेश्वर वांडकर सभागृहात शाळा व कार्यशाळा एकत्रित विद्यार्थी तसेच कर्मचारी यांनी भजन सादर केले.
शुक्रवारी सकाळी आरती झाल्यानंतर सर्व विद्यार्थी आणि कर्मचाऱ्यांनी गौरीचे खेळ खेळले. गाणी गायली व जाखडी नृत्य सादर केले. दुपारी अतुलित बलधाम उपासक यांच्या तर्फे भजन सादर करण्यात आले. गणेश मूर्तीची मिरवणूक काढून शाळेच्या पाठी गणेशमूर्तीचे पर्यावरणपूरक विसर्जन करण्यात आले.