आशाताई बच्छाव
मालगुंड येथील कवी केशवसुत स्मारकात ग्रंथप्रदर्शन उपक्रम
रत्नागिरी,(सुनील धावडे ब्युरो चीफ युवा मराठा न्युज नेटवर्क) तालुक्यातील मालगुंड येथील केशवसुत स्मारक सार्वजनिक वाचनालय व ग्रंथालय समितीच्यावतीने ग्रंथालय शास्त्राचे जनक डॉ. एस. आर. रंगनाथन यांच्या जयंती निमित्त ग्रंथप्रदर्शन उपक्रम नुकताच राबविण्यात आला. यावेळी मालगुंड येथील कवी केशवसुत स्मारक समितीचे कोषाध्यक्ष रविंद्र मेहेंदळे व कोमसाप, शाखा- मालगुंडचे सचिव विलास राणे या प्रमुख मान्यवरांच्या उपस्थितीत ग्रंथ प्रदर्शनाचे उद्घाटन करण्यात आले. याचवेळी ग्रंथालय शास्त्राचे जनक डॉ. एस. आर. रंगनाथन यांच्या जयंती निमित्त त्यांच्या प्रतिमेचे पूजन प्रमुख मान्यवरांच्या हस्ते करण्यात आले. त्यानंतर याच जयंतीचे औचित्य साधून आणि रत्नागिरीचे जिल्हाधिकारी यांच्या आदेशानुसार वाचनालयात सामूहिक राष्ट्रगीताचे गायन उपस्थित सर्वाच्यावतीने करण्यात आले.
या जयंती दिनानिमित्त ग्रंथालय शास्त्राचे जनक डॉ.एस.आर. रंगनाथन यांच्या कार्याबद्दल उपस्थित मान्यवरांनी आपले मनोगत व्यक्त केले. त्यानंतर ग्रंथालय प्रदर्शनामध्ये वाचनालयाचे ग्रंथपाल स्वप्नेश राजवाडकर यांनी प्रदर्शनातील विविध ग्रंथांबद्दल उपस्थितांना माहिती दिली. त्यानंतर उपस्थित मान्यवर व ग्रंथप्रेमीनी ग्रंथप्रदर्शनाची पाहणी करुन वाचनाचा लाभ घेतला. या कार्यक्रमाचे आभार प्रदर्शन वाचनालयाचे लिपीक साईकुमार डांगे यांनी केले.
हा कार्यक्रम यशस्वी करण्यासाठी कवी केशवसुत स्मारक सार्व. वाचनालयाचे ग्रंथपाल स्वप्नेश राजवाडकर यांचे समवेत स्मारक कर्मचारी साईकुमार डांगे, अस्मिता दुर्गवळी व स्पृहा लिंगायत यांनी विशेष मेहेनत घेतली.