राजेंद्र पाटील राऊत
लोककलांचे संगोपन व संवर्धन व्हावे: प्रा. ज्ञानेश्वर भोसले.
नांदेड/मनोज बिरादार ब्युरो चीफ युवा मराठा न्युज नेटवर्क
( शंकरनगर); महाराष्ट्राला लोककलांची व लोकसाहित्याची समृद्ध अशी परंपरा लाभलेली आहे. आज विद्यापीठ पातळीवर लोककलांचा अभ्यास होत असून अनेक उपेक्षित लोककलांना प्रतिष्ठा लाभत आहे. प्रसारमाध्यमांमधून लोककलांचे प्रसारण होत आहे. वासुदेव,भजन,भारुड, गोंधळ, कीर्तन या लोककलांप्रमाणे डोंबारी, बहुरूपी अशा लोककलांचेही संगोपन व संवर्धन झाले पाहिजे, असे विचार प्राध्यापक ज्ञानेश्वर भोसले यांनी मांडले. शंकरनगर येथील कला, वाणिज्य व विज्ञान महाविद्यालयातील मराठी विभागाच्या वतीने, मराठी भाषा संवर्धन पंधरवाडा 2022 च्या निमित्ताने आयोजित करण्यात आलेल्या ऑनलाइन व्याख्यानात ते बोलत होते. या कार्यक्रमाच्या अध्यक्षस्थानी गोदावरी मनार चॅरिटेबल ट्रस्टच्या सचिव डॉ. मीनलताई पाटील खतगावकर या होत्या. महाविद्यालयाचे प्राचार्य डॉ. बालाजी पिंपळे यांच्यासह अनेक मान्यवर व्याख्यानास उपस्थित होते, प्रमुख वक्ते म्हणून श्री. पी. एल. श्रॉफ कला आणि वाणिज्य महाविद्यालय चिंचणी, तालुका डहाणू, जिल्हा पालघर येथील प्रा. ज्ञानेश्वर भोसले हे बोलत होते. या कार्यक्रमाचे प्रास्ताविक डॉ. विश्वनाथ रत्नाळीकर यांनी केले. तर आभार प्रदर्शन डॉ. शरदचंद्र देगलूरकर यांनी केले. यावेळी ऑनलाईन पद्धतीने त्र्यंबक स्वामी, राजू गायकवाड, प्रा.डाॅ.गोविंद पाटील, प्रा.एम.एस.सगरोळे, डॉ. भगवान वाघमारे आदि मान्यवर उपस्थित होते तसेच डॉ. शंकर लेखने, डॉ. हेमंत बक्षी, डॉ. चेरीकर, डॉ. भुमरे व महाविद्यालयातील प्राध्यापक, शिक्षकेतर कर्मचारी आणि विद्यार्थ्यांनी या कार्यक्रमाचा लाभ घेतला.