आशाताई बच्छाव
खडक ओझर येथे ५० हजारांची लाच घेताना मंडळ अधिकाऱ्यास रंगेहाथ अटक
चांदवड | सुनील गांगुर्डे (विभागीय संपादक):
जमिनीच्या कब्जाबाबत न्यायालयाच्या आदेशानुसार कार्यवाही करून रेकॉर्ड व कब्जा देण्यासाठी ६० हजार रुपयांची लाच मागून तडजोडीअंती ५० हजार रुपये स्वीकारताना चांदवड तालुक्यातील मंडळ अधिकारी योगिता आनंद भोये यांना लाचलुचपत प्रतिबंधक विभागाच्या पथकाने रंगेहाथ पकडल्याने महसूल विभागात खळबळ उडाली आहे.
लाचलुचपत प्रतिबंधक विभाग, नाशिक यांनी दिलेल्या माहितीनुसार, तक्रारदार यांच्या खडक ओझर शिवारातील वडिलोपार्जित शेती जमिनीच्या कब्जाबाबत वाद निर्माण झाला होता. या प्रकरणी न्यायालयाने तक्रारदारांच्या बाजूने निर्णय दिल्यानंतर महसूल विभागाला कब्जा देण्याचे आदेश देण्यात आले होते. त्यानुसार तहसीलदार, चांदवड यांनी मंडळ अधिकारी योगिता भोये यांना आवश्यक कार्यवाहीचे आदेश दिले होते.
मात्र, संबंधित कार्यवाही करून तक्रारदारांना रेकॉर्ड व कब्जा देण्यासाठी स्वतःसह तलाठी व सज्जा खडक ओझर यांच्या नावाने ६० हजार रुपयांची लाचेची मागणी करण्यात आल्याची तक्रार लाचलुचपत प्रतिबंधक विभागाकडे करण्यात आली होती. पडताळणीत तक्रार सत्य आढळून आल्यानंतर सापळा रचण्यात आला.
यानुसार वडनेर भैरव पोलीस ठाण्याच्या हद्दीत आरोपी योगिता आनंद भोये (वय ३८), मंडळ अधिकारी, जोपुळ, ता. चांदवड, रा. प्रगतीनगर, बोऱगड, म्हसरूळ, नाशिक यांना ५० हजार रुपयांची लाच स्वीकारताना रंगेहाथ पकडण्यात आले. या प्रकरणी भ्रष्टाचार प्रतिबंधक अधिनियम १९८८ अन्वये गुन्हा दाखल करण्याची प्रक्रिया सुरू आहे.
ही कारवाई पोलीस निरीक्षक नेहा सूर्यवंशी यांच्या मार्गदर्शनाखाली पो. हवालदार विनोद चौधरी, पो.कॉ. अनिल गांगोडे, पो.हवा. प्रमोद चव्हाणे यांच्या पथकाने केली. तसेच पोलीस अधीक्षक भारत तांगडे, अपर पोलीस अधीक्षक माधव रेड्डी व अपर पोलीस अधीक्षक सुनील दोरंगे यांचे मार्गदर्शन लाभले.
लाचलुचपत प्रतिबंधक विभागाने नागरिकांना आवाहन केले आहे की, कोणताही शासकीय अधिकारी अथवा कर्मचारी कामासाठी लाचेची मागणी करत असल्यास तात्काळ विभागाशी संपर्क साधावा.
