आशाताई बच्छाव
शाळा बंद करणारा15 मार्च 2024 चा संचमान्यतेचा अन्यायकारक निर्णय रद्द करावा- मराठवाडा शिक्षक संघाचे निवेदन.
प्रतिनिधी जालना -वसंतराव देशमुख
दिनांक १५/०५/२०२५
15 मार्च 2024 च्या संच मान्यतेच्या शासनादेशामुळे शाळा बंद पडत असून त्यामुळे गोरगरीबांना शिक्षणाची दारे बंद होणार आहेत. सामान्य माणसाच्या शिक्षणाच्या नरडीला नख लावणारा अन्यायकारक शासनादेश रद्द करावा अशी मागणी मराठवाडा शिक्षक संघाचे अध्यक्ष सूर्यकांत विश्वासराव व सरचिटणीस राजकुमार कदम यांनी राज्याचे मुख्यमंत्री व शालेय शिक्षण मंत्री यांचेकडे निवेदनाद्वारे केली आहे.
मराठवाडा शिक्षक संघाचे जिल्हा सचिव संजय येळवंते…… यांनी याबाबत दिलेल्या प्रसिध्दीपत्रकात म्हटले आहे की, राज्याच्या शालेय शिक्षण व क्रिडा विभागाने खाजगी अनुदानित शाळेतील संचमान्यतेसाठी 15 मार्च 2024 रोजी शासनादेश निर्गमित केला आहे. या शासनादेशान्वये संचमान्यता केल्यामुळे अनेक शाळेतील शिक्षकांची पदे कमी झाली आहेत, अनेक शाळेत शून्य पदे झाल्याने अशा शाळा बंद पडणार आहेत परिणामी या शाळेतील विद्यार्थ्यांचे शिक्षण धोक्यात येणार आहे.
सार्वजनिक शिक्षण व्यवस्थेच्या नरडीला नख लावणारा, गोरगरीबांना शिक्षणाची दारे बंद करणारा हा जाचक अन्यायकारक शासनादेश असल्याने तो रद्द करावा आणि 28 ऑगस्ट 2015 च्या शासनादेशानुसार संच निर्धारण करण्यात यावा. अशी मागणी करण्यात आली आहे.
निवेदनात पुढे म्हटले आहे की, मुंबई उच्च न्यायालयात याचिका क्र 5456/2025 मधील आदेशानुसार संचमान्यतेची ‘जैसे थे’ स्थिती ठेवण्याचे आदेश देण्यात आले आहेत. न्यायालयीन निर्णयाची त्वरित अंमलबजावणी करण्यात यावी. सदरील शासनादेशाप्रमाणे शिक्षकांना अतिरिक्त ठरवण्यात येवू नये. सार्वजनिक शिक्षण व्यवस्थेला हानिकारक 15 मार्च 2024 च्या संचमान्यतेच्या अन्यायकारक शासन आदेशामुळे राज्यातील शिक्षण क्षेत्रात प्रचंड असंतोष निर्माण झालेला आहे. त्याची दखल घेऊन तो अन्यायकारक शासन आदेश रद्द करण्यात यावा अन्यथा तीव्र आंदोलनाचा इशारा मराठवाडा शिक्षक संघाचे अध्यक्ष सुर्यकांत विश्वासराव,सरचिटणीस राजकुमार कदम,कोषाध्यक्ष औताडे ए.बी., उपाध्यक्ष ज्ञानोबा वरवट्टे,केंद्रीय कार्यकारणी सदस्य प्रेमदास राठोड, आरेफ कुरेशी, जिल्हाध्यक्ष रमेश आंधळे, मार्गदर्शक डॉ मारुती तेगमपुरे, डॉ पुरुषोत्तम जुन्ने, कोषाध्यक्ष नारायण मुंडे, उपाध्यक्ष भीमाशंकर शिंदे, जगन वाघमोडे, सहसचिव गणेश चव्हाण,प्रद्युम्न काकड,दीपक शेरे, महिला शहराध्यक्ष ज्योती पांगारकर युवा शहराध्यक्ष सोहम बोदवडे, प्रसिद्धी प्रमुख, भगवान धनगे, हकीम पटेल, सदस्य तुकाराम पडघन यांनी केले आहे.
