आशाताई बच्छाव
नाशिक मध्ये नवा ट्विस्ट शिक्षक मतदारांना भेटवस्तू आणि पैसे वाटप..?
सतीश सावंत (कसमादे विभागीय प्रतिनिधी)
दिनांक 24 जून 2024
नाशिकच्या निवडणुकीत शिंदे गटाकडून पैसे वाटप केल्याचे आरोप ठाकरे करून करण्यात आले आहेत. थेट मुख्यमंत्र्यांच्या एंट्रीने नाशिक शिक्षक मतदार संघाची निवडणूक ही आता हाय व्होल्टेज झाली असून, रोज नवनवीन ट्विस्ट येताना दिसत आहेत. नुकतंच मुख्यमंत्री एकनाथ शिंदे यांनी नाशिक शिक्षक मतदारसंघातील उमेदवार किशोर दराडे यांच्या प्रचारार्थ बैठका घेतल्या. यानंतर ठाकरे गटाचे नेत्या सुषमा अंधारे यांनी नाशिकच्या निवडणुकीत शिंदे गटाकडून शिक्षक मतदारांना पैसे वाटप करण्यात आल्याचे आरोप केले होते.
*शिक्षक मतदारांना भेटवस्तू वाटप*
यानंतर आता पुन्हा नाशिक शिक्षक मतदार संघातील शिक्षक महिला मतदारांना नथ आणि पुरुषांना कपडे देण्यात आल्याचे आरोप शिक्षण तज्ञ हेरंब कुलकर्णी यांनी केला असून याप्रकरणी निवडणूक आयोगाने तात्काळ दखल घेऊन कारवाई करावी अशी मागणीही त्यांनी केली आहे.
नाशिक शिक्षक मतदारसंघात शिवसेना शिंदे गटाचे विद्यमान आमदार किशोर दराडे, अजित पवार गटाचे महेंद्र भावसार, महाविकास आघाडी कडून शिवसेना ठाकरे गटाचे संदीप गुळवे, तर अपक्ष उमेदवार विवेक कोल्हे यांच्यात ही लढत रंगली आहे. 26 जूनला या जागेसाठी मतदान होणार असून मतदानासाठी अवघे दोन दिवस शिल्लक असताना या आरोपांनी राजकीय वर्तुळात खळबळ उडवली आहे.
मागील निवडणुकीत पैठणी मुळे वाद
नाशिक शिक्षक मतदार संघाच्या मागील निवडणुकीतही महिला शिक्षक मतदारांना पैठणी वाटण्यात आली होती. तर, यामुळे वादी झाला होता. काही ध्येयवादी शिक्षकांनी या वाटण्यात आलेल्या पैठण्या जाळून या प्रकारचा निषेधही केला होता. त्यावेळीही या प्रकारची हेरंब कुलकर्णी यांनी निवडणूक आयोगाकडे तक्रार केली होती. मात्र, याही निवडणुकीत पुन्हा तेच घडत असून, काही उमेदवार पुन्हा शिक्षकांना वस्तू वाटप करत असल्याच्या चर्चा आहेत.
यावेळी पुरुष शिक्षक मतदारांना रेमंड कंपनीचे सफारीचे कापड व महिला शिक्षक मतदारांना नथ दिली जात असून या वस्तूंचे फोटो सोशल मीडियावर व्हायरल होताना दिसत आहेत. जळगाव जिल्ह्यात तर थेट शाळेत जाऊन या भेटवस्तूंची वाटप करण्यात आल्याचेही सांगण्यात येत आहे. त्यामुळे निवडणूक आयोगाने या प्रकरणाची गंभीर दखल घेण्याची आणि कारवाई करण्याची मागणी शिक्षण तज्ञ हेरंब कुलकर्णी यांच्याकडून करण्यात आली आहे.