आशाताई बच्छाव
सार्वजनिक बांधकाम मंडळ, गडचिरोली येथे ‘माहितीचा अधिकार अधिनियम २००५’ वर प्रभावी प्रशिक्षण कार्यशाळा यशस्वीरीत्या पार ।
श्री मनोज उराडे जिल्हाध्यक्ष माहिती अधिकार पत्रकार संरक्षण व पोलीस मीञ समीती गडचिरोली
गडचिरोली, सुरज गुंडमवार ब्युरो चीफ: लोकशाहीच्या सशक्तीकरणासाठी आणि प्रशासनाच्या पारदर्शकतेसाठी अत्यंत महत्त्वपूर्ण ठरणारी ‘माहितीचा अधिकार अधिनियम २००५’ विषयक प्रशिक्षण कार्यशाळा सार्वजनिक बांधकाम मंडळ, गडचिरोली येथे अत्यंत उत्साहात संपन्न झाली.
या कार्यशाळेच्या अध्यक्षस्थानी श्री. प्रशांत धोंगे, सहाय्यक अधीक्षक अभियंता, सार्वजनिक बांधकाम मंडळ हे होते, तर प्रमुख प्रशिक्षक म्हणून श्री. मनोज उराडे सर यांनी प्रभावी आणि मार्गदर्शक सादरीकरण केले. कार्यक्रमाची प्रस्तावना आणि आभार प्रदर्शन श्री. कोहोळे, शासकीय अभियंता यांनी मनोगतपूर्वक सादर केले.
श्री. मनोज उराडे यांनी माहितीचा अधिकार अधिनियमातील सर्व ३१ कलमं आणि ६ प्रकरणांची सखोल, सुसंगत आणि प्रभावी मांडणी करत कायद्याची संपूर्ण रचना उपस्थितांना सहज आणि स्पष्ट समजेल अशा पद्धतीने उलगडून दाखवली. ही कार्यशाळा केवळ माहिती पुरवण्यापुरती मर्यादित नव्हती, तर ती लोकशाही प्रबोधनाची एक चळवळ ठरली. सामान्य नागरिकांपर्यंत माहितीचा अधिकार पोहोचवण्याची जबाबदारी स्वीकारताना प्रशासनाला अधिक पारदर्शक आणि उत्तरदायी बनवण्याचा एक सकारात्मक प्रयत्न म्हणून या कार्यशाळेकडे पाहता येईल. या वेळी सार्वजनिक बांधकाम मंडळ व सार्वजनिक बांधकाम उपविभाग क्र. २ मधील सर्व अधिकारी, पदाधिकारी आणि कर्मचारी यांनी कार्यशाळेत उत्स्फूर्त सहभाग नोंदवला.
प्रशिक्षणादरम्यान केवळ कायद्याची मूळ तत्त्वेच नव्हे, तर त्याचा समाजातील व्यावहारिक उपयोग, निर्णय प्रक्रियेतील पारदर्शकता आणि प्रशासन-जनतेतील विश्वास याबद्दल सखोल चर्चा करण्यात आली. प्रशिक्षक श्री. मनोज उराडे यांनी अत्यंत प्रभावी शब्दांत म्हटले ” बहुतेक कायदे शासन जनतेवर राबवते, पण हा कायदा जनतेने शासनावर राबवायचा असतो – यातच त्याचं खरं सामर्थ्य आहे. ” त्यांनी हेही अधोरेखित केलं की, माहितीचा अधिकार कायदा म्हणजे केवळ एक कायदेशीर साधन नसून, तो जनतेच्या हक्कांचा एक उगमबिंदू आहे, जो शासन व्यवस्थेला पारदर्शकतेच्या दिशेने नेत असतो. कार्यशाळेच्या शेवटी सहभागी सर्व प्रशिक्षणार्थींनी समाधान व्यक्त केले. त्यांच्या चेहऱ्यावर जाणवणारा आत्मविश्वास आणि सजगता हा कार्यशाळेच्या यशाचा स्पष्ट पुरावा ठरला.
कार्यक्रमास श्री. सूरज गुंडमवार, जिल्हा उपाध्यक्ष माहिती अधिकार पत्रकार संरक्षण व पोलीस मित्र समिती, आणि सौ. अनुपमा रॉय महिला अध्यक्ष तालुका चामोर्शी, यांचीही उपस्थिती लक्षणीय ठरली. तसेच या कार्यशाळेच्या यशस्वी आयोजनामध्ये श्री. मनीष नारनवरे यांचे विशेष योगदान लाभले.ही कार्यशाळा गडचिरोलीच्या लोकशाही परंपरेला बळकटी देणारी, प्रशासनाला जनतेच्या अधिक जवळ नेणारी आणि माहितीच्या अधिकाराच्या विचारसरणीला उजाळा देणारी ठरली. आजचा दिवस हा केवळ प्रशिक्षणाचा नव्हे, तर जवाबदारीची जाणीव करून देणारा आणि लोकशाहीच्या उज्वल भविष्याची दिशा दाखवणारा एक महत्त्वपूर्ण टप्पा ठरला.
