आशाताई बच्छाव
चाळीसगावात 51 हजाराचा गुटखा जप्त
चाळीसगाव प्रतिनिधी विजय पाटील – प्रतिबंधीत गुटख्याची दुचाकीवरून अवैध वाहतुक करणाऱ्या दोघांना 21 रोजी रात्री साडे दहा वाजेच्या सुमारास चाळीसगाव ते वाघळी दरम्यान बोरखेडा गावाच्या अलीकडे एका हॉटेलसमोर चाळीसगाव ग्रामीण पोलीसांनी पकडले असून. त्यांच्याकडून मोटारसायकल सह गुटखा असा 80 हजार 720 रूपये किंमतीचा ऐवज जप्त करण्यात आला आहे.
याबाबत माहीती अशी की संशयित अन्सारी सईद अहमद (34) रा. जाफरनगर, बिस्मिल्ला हॉटेलच्या पाठीमागे, मालेगाव व शेख इरफान शेख युनुस (39) रा. सायगाव ता. चाळीसगाव हे एमएच.15 डीएन.1126 या दुचाकीवरून स्वत:च्या आर्थिक फायद्यासाठी महाराष्ट्र शासनाने प्रतिबंधीत केलेला तंबाखूजन्य सुगंधीत पान मसाल्याची अवैध वाहतुक करतांना चाळीसगाव ग्रामीण पोलीसांना मिळून आले. त्यांच्याकडून सुमारे 50 हजार 720 रूपये किमतीचा विमल कंपनीचा गुटखा व 30 हजार रूपये किंमतीची मोटारसायकल असा 80 हजार 720 रूपये किंमतीचा ऐवज जप्त करण्यात आला.
याप्रकरणी हवालदार शांताराम पवार यांनी दिलेल्या फिर्यादीवरून संशयित अन्सारी सईद अहमद व शेख इरफान शेख युनुस या दोघांच्या विरोधात चाळीसगाव ग्रामीण पोलीस स्टेशनला अन्न सुरक्षा आणि मानके अधिनियम अन्वये गुन्हा दाखल करण्यात आला आहे. तपास पोलीस निरीक्षक ज्ञानेश्वर जाधव करीत आहेत.
