आशाताई बच्छाव
अपंगत्वावर मात करत प्रविण महाजन यांचा बॉडीबिल्डींग स्पर्धेत भारतातून दुसरा क्रमांक
हजारोंसाठी ठरले प्रेरणास्त्रोत : दक्षता फिटनेस क्लबच्या वतीने गौरव
वाशिम, गोपाल तिवारी ब्युरो चीफ: अपंगत्व ही मर्यादा नाही, तर ती संधी असल्याचे सिद्ध करत वाशिम शहरातील प्रवीण मुकेशकुमार महाजन यांनी बॉडी-बिल्डिंग क्षेत्रात मोठे यश मिळवले आहे. जिल्हा परिषद प्राथमिक शाळा, सुराळा येथे शिक्षक म्हणून कार्यरत असलेले महाजन सर यांनी शिर्डी येथे झालेल्या इंडियन बॉडी-बिल्डिंग अ‍ॅण्ड फिटनेस फेडरेशनच्या राष्ट्रीय बॉडीबिल्डींग स्पर्धेत संपुर्ण भारतातून द्वितीय क्रमांक पटकावून रौप्य पदक मिळवले. त्यांच्या या उल्लेखनीय यशाबद्दल दक्षता फिटनेस क्लबच्या वतीने गुरुवार, २७ मार्च त्यांचा सत्कार करण्यात आला.
ही प्रतिष्ठित स्पर्धा २५ मार्च रोजी शिर्डी येथे पार पडली. यंदा या स्पर्धेचे ६२ वे वर्ष होते. पोलिओमुळे ४७ टक्के अपंगत्व असूनही ४३ वर्षांच्या वयातही जिद्द आणि मेहनतीच्या जोरावर बॉडी-बिल्डिंगचा छंद जोपासत महाजन यांनी हे यश मिळवले आहे. कठीण परिस्थितीवर मात करत प्रवीण महाजन यांनी मिळवलेले यश अनेकांसाठी प्रेरणादायी ठरत आहे. या प्रवासात आंतरराष्ट्रीय खेळाडू व वाशिम पोलीस प्रदीप पाटील यांचे मार्गदर्शन त्यांना लाभले. त्यांच्या संघर्षमय प्रवासाने नवोदित खेळाडूंना नवी ऊर्जा दिली असून, अपंगत्वावर मात करून स्वप्नं साकारली जाऊ शकतात, हे त्यांनी सिद्ध केले आहे.
