आशाताई बच्छाव
मढी येथील ‘तो’ ठराव रद्द
पाथर्डी अहिल्या नगर कारभारी गव्हाणे प्रतिनिधी: तालुक्यातील मढी येथील ग्रामसभेत यात्रा काळात मुस्लिम व्यवसायिकांना व्यवसाय करण्यास बंदी घालण्याचा जो ठराव करण्यात आला होता, तो ठराव अखेर गटविकास अधिकारी शिवाजी कांबळे यांनी आपल्या अधिकारात रद्द केला आहे. हा ठराव झाल्यानंतर मोठी खळबळ उडाली होती.
मुस्लिम व्यवसायिकांना व्यवसाय करण्यास बंदीचा ठराव
२३ फेब्रुवारी रोजी मढी येथे ग्रामसभेचे आयोजन करण्यात आले होते. या सभेच्या अध्यक्षपदी सरपंच संजय मरकड होते. तर या सभेला ग्रामविकास अधिकारी अनिल लवांडे यांच्यासह मोजके ग्रामस्थ उपस्थित होते. या सभेत ऐनवेळेसच्या विषयात मुस्लिम व्यवसायिकांना मढी यात्रेत व्यवसाय करण्यास बंदी घालण्याचा ठराव संमत करण्यात आला होता. हा ठराव संमत झाल्यानंतर अनेकांनी जिल्हाधिकाऱ्यांची भेट घेत हा ठराव रद्द करण्याची मागणी केली होती.
ग्रामविकास आधिकाऱ्यांना बजावली होती कारणे दाखवा नोटीस
यानंतर गटविकास अधिकारी कांबळे यांनी या विषयावर एक चौकशी समिती नेमत ग्रामविकास आधिकाऱ्यांना कारणे दाखवा नोटीस बजावली होती. ही नोटीस बजावताना आयोजित केलेली सभा ही घरकुल या विषयवार असतानाही ऐनवेळेसच्या विषयात हा ठराव कसा घेतला. या सभेस उपस्थित असणाऱ्या नागरिकांसह या ठरावाचे जे सूचक व अनुमोदक आहेत त्यांचेही जबाब घेण्याचे आदेश कांबळे यांनी नोटिशीत बजावत या नोटिसीचे उत्तर २४ तासात देण्याचे आदेश दिले होते. या संदर्भात लवांडे यांनी दिलेला खुलासा व चौकशी समितीच्या अहवालाची छाननी केल्यानंतर कांबळे यांनी हा वादग्रस्त ठराव नामंजूर केला असून तसा अहवाल त्यांनी जिल्हा परिषदेच्या मुख्य कार्यकारी अधिकाऱ्यांना पाठवला आहे.
