आशाताई बच्छाव
चाळीसगावात इलेक्ट्रिक मोटार पंप चोरणारे तिघे पोलिसांच्या ताब्यात
चाळीसगाव प्रतिनिधी विजय पाटील- चाळीसगाव शहर पोलीसांनी इलेक्ट्रीक पंप चोरणाचे त्रिकूट ताब्यात घेतले आहे. विशेष म्हणजे या त्रिकूटापैकी एकाच्या मैत्रिणीस एक हजार रूपयांची गरज असल्याने व तिला देण्यासाठी पैसे नसल्याने पंप चोरी करून तो विक्री करण्याचा बेत आखून चोरी केल्याची कबुली दिली आहे.
चाळीसगाव शहर पोलीस ठाण्याकडून गस्तीदरम्यान संशयित वाहनांवर लक्ष ठेवून त्यांची तपासणी करण्यात येते.दि.30 रोजी दुपारी पोलीस उपनिरीक्षक योगेश माळी, हवालदार रवि पाटील, दीपक पाटील, प्रविण जाधव, शिपाई अमोल भोसले, गणेश कुवर, गोपाल पाटील हे घाट रोड परिसरात गस्त घालत असतांना तीन इसम दुचाकीवर इलेक्ट्रीक मोटारपंप घेऊन जातांना दिसले.
पोलीसांना त्यांचा संशय आल्याने त्यांना पळून जाण्याची संधी न देता ताब्यात घेऊन त्यांच्याकडील इलेक्ट्रीक पंपाबाबत विचारणा केली असता ते उत्तर देत नसल्याने पोलीसांनी मोटारपंपासह दुचाकी ताब्यात घेतली.या तिघांवर महाराष्ट्र पोलीस अधिनियम कलम 124 व भारतीय न्याय संहिता कलम 3(5)प्रमाणे शहर पोलीस ठाण्यात गुन्हा दाखल करण्यात आल्याची माहिती पोलीस निरीक्षक संदीप पाटील यांनी दिली.
पोलीसांनी ताब्यात घेतलेल्या या तिघांची चौकशी केली असता सदर मोटारपंप हा त्यांच्यातीलच एकाच्या काकाच्या शेतातून चोरल्याची कबुली दिली. चोरीचे कारण विचाले असता या इसमांपैकी एकाच्या मैत्रिणीस 1 हजार रूपयांची गरज असल्याने व तिला देण्यासाठी पैसे नसल्याने इलेक्ट्रीक पंप चोरी करून तो विक्री करण्याची योजना केल्याची माहिती दिली.