आशाताई बच्छाव
श्रीक्षेत्र गोंदी येथे श्रीदत्तजयंती महोत्सवाची सांगता
युवा कौशल्य गुणगौरवाद्वारे तरुणांचा सत्कार
श्रीक्षेत्र गोंदी / जालना दिलीप बोंडे ब्युरो चीफ: येथे गेल्या तीन दशकांपासून सुरू असलेल्या
श्रीदत्तजयंती महोत्सवाची सांगता अध्यात्मरत्न ह.भ.प. प्रकाश महाराज
गोंदीकर यांच्या काल्याच्या कीर्तनाने झाली. या प्रसंगी महाप्रसाद
घेण्यासाठी गोंदी परिसरातील भाविक भक्त बहुसंख्येने उपस्थित होते.
याप्रसंगी ग्रामीण भागातील होतकरू व कुशल युवकांना प्रोत्साहन म्हणून
युवा कौशल्य गुण गौरव सोहळा आयोजित करण्यात आला होता. यात गोंदी येथील
प्रगतिशील युवा शेतकरी श्यामसुंदर जगदीश जहागिरदार याचा महात्मा फुले
कृषी विद्यापीठ राहुरी येथून कृषी क्षेत्रातील आधुनिक तंत्रज्ञान म्हणून
ओळखल्या जाणार्‍या ड्रोन टेक्नॉलॉजीचे विशेष प्रशिक्षण घेवून आल्या बद्दल
विशेष गुणगौरव करण्यात आला. या प्रशिक्षणासाठी जालना जिल्ह्यातील केवळ
दोन युवकांची निवड झाली होती, त्यापैकी गोंदी येथील या युवकाचा निवड झाली
होती असे त्याने मनोगत व्यक्त करतांना सांगितले.
तसेच मराठवाडा कीर्तन महोत्सव या उपक्रमा अंतर्गत श्रीक्षेत्र आयोध्या
येथे कीर्तन सेवा व अन्य धार्मिक सेवा देवून आलेल्या ह.भ.प.सुहास पद्माकर
रामदासी यांचाही विशेष सन्मान करण्यात आला.श्रीदत्त जयंतीनिमित्त गोंदी
येथील दत्त मंदिरात सामुदायिक दासबोध पारायण, श्रीगुरुचरित्र
अनुष्ठान,विष्णुसहस्त्रनाम- गीतापाठ, दत्तपंचपदी , श्रीमद्भागवत कथा,
नित्य हरिपाठ भजन, मराठवाडा कीर्तन महोत्सव आदी विविध धार्मिक
कार्यक्रमांचे आयोजन करण्यात आले होते. यात ह.भ.प. प्रदीप महाराज मुळे
गोंदीकर यांनी श्रीमद्भागवताच्या षष्ठ स्कंधाचे भावपूर्ण विवेचन केले .
तसेच मराठवाडा नारदीय कीर्तन महोत्सवात ह.भ.प. सुहासबुवा रामदासी, ह.भ.प.
योगीराजबुवा मुळे, आदी उपस्थित होते.
