आशाताई बच्छाव
विठ्ठल नामाची शाळा भरली’ डॉ.सौ.प्रमिलाताई पूर्णपात्रे विद्यालयाच्या विद्यार्थ्यांचा ज्ञानदिंडी,पर्यावरण दिंडी व नयनरम्य रिंगण सोहळा..
चाळीसगाव प्रतिनिधी विजय पाटील- वारकऱ्यांच्या वेशभूषेतील लहान मुले, पालखी मिरवणूक आणि विठू नामाचा गजर, अशा विठ्ठलमय वातावरणात डॉ.सौ.प्रमिलाताई पूर्णपात्रे प्राथमिक विद्यालय, चाळीसगावच्या विद्यार्थ्यांचा 16 रोजी वीर सावरकर चौकात आषाढी एकादशी दिंडी रिंगन सोहळा मोठ्या उत्साहात पार पडला. विठ्ठल-रखुमाई, संत ज्ञानेश्वर, संत तुकाराम,संत वासुदेव व अन्य संतांच्या वेशभूषा केलेले विद्यार्थी रिंगण सोहळयात आकर्षण ठरले.
शाळेतील सर्व मुला-मुलींनी यावेळी वारकऱ्यांचे पोशाख परिधान केले होते. कोणी विठोबा तर कोणी वासुदेव बनले होते. सकाळी शाळेच्या मैदानावर संस्थेच्या सचिव डाॅ.सौ. शुभांगीताई पूर्णपात्रे यांच्या हस्ते पालखी पुजन करून पालखी सोहळ्याला दिंडीला सुरूवात झाली
यावेळी मुख्याध्यापक रमेश सोनवणे, शिक्षक राजेंद्र वराडे, आनंद जगताप आदी उपस्थित होते. यावेळी पोलीस उपनिरीक्षक योगेश माळी, विलास बाविस्कर, हवालदार विनोद भोई, गटशिक्षणाधिकारी विलास भोई, विरेंद्र पाटील, पंकज रणदिवे यांनी पालखी पुजन केले.
हा दिंडी सोहळा यशस्वी करण्यासाठी विद्यालयातील सर्व शिक्षक बंधू-भगिनी व शिक्षकेतर कर्मचारी यांचे सहकार्य लाभले.